БИШКЕК, 21-дек. — Sputnik. Мэрдин милдетин аткаруучу Балбак Түлөбаев жыйында Бишкекке катализатору жок унааларды киргизбөө сунушун берди.
"Катализатор боюнча айта турган болсок, унааларды техникалык кароодон өткөрүү керек деп эсептейм. Айдоочулар макул болбосо дагы бизде башка жол жок. Шаарды сактап калыш керек. Калаага кирген унааларды текшерип, катализатору жокторду киргизбеш керек. Себеби мындай унаалар Бишкекте ыштын пайда болушуна 20-30 пайыз салым кошуп жатат. Бир белгини таап, аны катализатору бар унаалардын алдыңкы терезесине чапташ керек", — деди Түлөбаев.
Ал бул маселе боюнча өкмөткө кайрылууну тапшырды.
"Эгер өкмөт тапшырма берсе, милиция менен биргеликте иш алып барабыз. Болбосо шаардык кеңештин чечими менен унаалардын катализатору бар-жогун текшерүү керек", — деди мэр.
Буга чейин көпчүлүк унааларда катализатору жок экени белгиленип жаткан. Кыргызстанда милдеттүү техникалык көзөмөл жокко чыгарылган, ал эми транспорттун экологияга зыяны боюнча масштабдык текшерүүлөр жүргүзүлбөйт.
Ал эми мэрия абанын булганышы былтыркыга салыштырмалуу быйыл 35-50 пайызга жогорулаганын моюндаган.
Абанын булганышы боюнча дүйнөлүк рейтингде Бишкек алдыңкы сапка чыкты. Калаа Кабул, Лахор жана Карачиден кийинки орунда эле турат.