БИШКЕК, 20-дек. — Sputnik. WhatsApp мессенджери 2021-жылдан тарта тиркеменин стол версиясына үн жана видеочалуулар функциясын ишке киргизет. Бул тууралуу "Прайм" жазып чыкты.
Башкача айтканда, жарандар компьютерден да чала алышат. Декабрь айында WhatsApp бул опцияны айрым колдонуучуларга сыноо иретинде берген.
Пандемиянын экинчи толкуну ар кайсы өлкөлөрдөгү көптөгөн адамдарды үйдө отурууга мажбур кылып, ошону менен видеочалуулардын жана онлайн-байланыштын популярдуулугун арттырганы белгиленди.
Дүйнө жүзү боюнча эки миллиарддан ашуун колдонуучусу бар WhatsApp компьютердик чалууларды ишке киргизүү менен видеоконференция кызматтарын көрсөтүүчү Zoom жана Google Meet сыяктуу ири каражаттар менен теңтайлашууга ниеттенүүдө.