БИШКЕК, 16-дек. — Sputnik. Балыкчы шаарында каржы пирамидасы боюнча алдамчылык кылган сотко чейинки 1 337 иш аяктап, соттун кароосуна жиберилди. Бул тууралуу Ысык-Көл облустук ички иштер башкармалыгынын маалымат кызматы кабарлады.
Ага ылайык, ушул жылдын 8-августунан 1-декабрына чейин Балыкчы ШИИБдин Кылмыш жана жоруктардын бирдиктүү реестрине каржы пирамидасы боюнча алдамчылык кылган 2 159 факты катталган.
Алдамчылыктын 1 337 фактысы боюнча сотко чейинки өндүрүш иштери аяктап, соттун кароосуна жиберилди. Ал эми 30 факты боюнча материалдык зыяндын орду толтурулгандыгына байланыштуу кыскарган. Калган 1 327 арыз бир өндүрүшкө бириктирилген.
"Пирамиданын алгачкы катышуучуларына кийинки катышуучулардын акчаларынан киреше кылып төлөп берип, калган каражатты өздөрүнө калтырып жүргөн "Ак-Куу" каржы пирамидасына карата сотко чейинки өндүрүш иши аяктады. Бул каржы пирамидасы боюнча тергөөдөн 28 жаштан 55 жашка чейинки Балыкчы шаарынын беш тургуну өтүүдө. Алар 30 миллион сомдун тегерегинде зыян келтирген", — деп жазылат билдирмеде.
"Ак-Тилек" деп аталган каржы пирамидасынын К.И. аттуу башчысына карата да өндүрүш иши аяктап, сотко жөнөтүлдү. Ал 84 аманатчыны жалпы суммасы 25 миллион сомдон ашык зыянга учуратканы белгилүү болду.