БИШКЕК, 15-дек. — Sputnik. Мамлекеттик каттоо кызматы жалпы жарандык биометрикалык паспорттордун жаңы үлгүсүн алды. Бул тууралуу аталган ведомстводон билдиришти.
Маалыматка караганда, учурда бланкаларды, коргоочу элементтерди жана дизайнды текшерүү жүрүп жатат.
Эске салсак, 2020-жылдын 29-майында Мамкаттоо менен германиялык Mühlbauer ID Services GmbH компаниясынын ортосунда электрондук паспорттордун бланкаларын жеткирүү боюнча келишим түзүлгөн.
Жаңы паспорттордун артыкчылыгы — коргоочу 30 элемент камтылып, электрондук чип жайгашкан. Ошондой эле заманбап материалдар менен жасалып, жеке маалыматтар лазердик технология менен жазылат.
Жаңы паспортторду 2021-жылдын биринчи жарым жылдыгында ишке киргизүү пландалып жатат.