БИШКЕК, 12-дек. — Sputnik. Президенттин милдетин аткарып жаткан Жогорку Кеңештин төрагасы Талант Мамытов "Кыргыз Республикасынын башкаруу формасын аныктоо боюнча референдумду (бүткүл элдик добуш берүүнү) дайындоо тууралуу" мыйзамына кол койду. Бул тууралуу мамлекет башчынын маалымат кызматы кабарлады.
Аталган мыйзам ЖК тарабынан ушул жылдын 10-декабрында кабыл алынган. Анда өлкөнүн бардык аймагында 2021-жылдын 10-январында, жекшемби күнгө референдум дайындоо каралган.
Референдумга Кыргызстанды төмөндөгүдөй башкаруу формаларын тандоо маселеси чыгарылат:
- президенттик республика;
- парламенттик республика;
- бардык варианттарга каршы.
Мыйзам расмий жарыяланган күндөн тартып күчүнө кирет.