БИШКЕК, 12-дек. — Sputnik. Улуу жазуучу Чыңгыз Айтматовдун "Ала-Тоо" аянтындагы эстелигине гүл коюлуп, бир катар иш-чаралар өтүп жатат. Бул тууралуу Маданият, маалымат жана туризм министрлиги кабарлады.
Бүгүн, 12-декабрда, чыгаан жазуучунун туулган күнүн утурлай Улуттук адабият күнү белгиленүүдө.
Иш-чарага маданият министринин орун басары Илязбек Балташев, билим берүү жана илим министринин орун басары Надира Жусупбекова, Республикалык китепкананын директору Роза Султангазиева жана USAID агенттигинин "Окуу керемет!" долбоорунун директору Лиана Гертч катышкан.
Республикалык китепканада Айтматовго байланышкан онлайн жана офлайн иш-чаралар өткөнү белгиленди.
Ошондой эле Чыңгыз Айтматов атындагы Кино үйүндө студенттерге "Айтматов дүйнөсү" аталышындагы даректүү тасма көрсөтүлгөн. Анын режиссёру Бакыт Карагулов болгон.