БИШКЕК, 11-дек. — Sputnik. Эл аралык футбол федерациясы (FIFA) 2020-жылы чыгарган улуттук курама командалардын рейтингинде Кыргызстан 96-орунга жайгашты. Бул тууралуу дүйнөлүк уюмдун расмий сайтында айтылат.
Жаңыланган рейтинг кечээ, 10-декабрда, жарыяланган.
Быйыл пандемияга байланыштуу Кыргызстан курама командасы оюн өткөргөн жок. Мындан улам ата мекендик футболчулардын дүйнөлүк рейтингде көрсөткүчү жок болду. Сентябрдагы тизмеде команда бир позицияга көтөрүлүп, 95-орунга жайгашкан болчу. Өткөн айда кайра мурдагы позициясына түшкөн.
2019-жылдагы рейтингдин жыйынтыгына салыштырмалуу улуттук команда мурдагы эле ордунда калып келет. Анын активинде 1 240 упай бар.
Бельгия курама командасы дагы деле биринчи орунду, экинчини Франция ээлеген. Бразилия үчүнчү сапка жайгашса, андан ары Англия жана Португалия турат.
Кошуна Өзбекстан 85-орунда, Тажикстан 121, ал эми Казакстан рейтингде 122-катарга түшкөн.