БИШКЕК, 10-дек. — Sputnik. Биринчи май райондук соту Алмазбек Атамбаевдин баш коргоо чарасын үй камагына алмаштыруу сунушун канааттандырган жок. Бул тууралуу мурдагы президенттин адвокаты Замир Жоошев билдирди.
Ал ошондой эле 7-декабрда сот Атамбаевди №47 колониядан УКМКнын тергөө абагына которуу чечимин кабыл алган. Жактоочулар бул чечимге каршы даттанганы жатат.
"Алмазбек Атамбаевди 30-ноябрдан 7-декабрга чейин мыйзамсыз негизде камакта кармап турушту. Жогорку сот баш коргоо чарасын аныктаган эмес болчу. Эми сот аны камакта калтырууну чечип койду. Бирок айыптоочу тарап муну өтүнгөн эмес болчу", - деди адвокат.
Жоошевдин айтымында, Атамбаевдин абалы начарлап бара жатат. №47 абактын дарыгерлери андан көп ооруларды (бронхит, грыжа, пневмониядан кийинки башка оорулар) тапкан.