БИШКЕК, 8-дек. — Sputnik. Армениянын борбору Ереван шаарында оппозициялык маанайдагы жарандар митингге чыгып, премьер-министр Никол Пашиняндын отставкасын талап кылууда. Бул тууралуу РИА Новости жазды.
Нааразычылык акциясына чыккандар көчөлөрдү жаап жатышат. Ошол эле учурда полиция митингге катышкандардын айрымдарын кармап жатканы кабарланды.
Эске салсак, Армения, Азербайжан жана Россиянын лидерлери Тоолуу Карабахтагы куралдуу тирешти токтотуу боюнча келишимге кол коюп, ал 10-ноябрда күчүнө кирген.
Ага ылайык, Агдам району менен Газах районундагы аймак 2020-жылдын 20-ноябрына чейин Азербайжанга кайтарылган. Ошондой эле Арменияга 15-ноябрга чейин Кельбаджар районун, 1-декабрга чейин Лачын районун Азербайжанга өткөрүп берүү милдети жүктөлгөн. Мындан улам армениялыктар өкмөт башчыга каршы чыгып, отставкасын талап кылууда.