БИШКЕК, 8-дек. — Sputnik. "Барселона" Чемпиондор лигасынын тайпалык баскычында "Ювентус" менен болуучу оюндун алдында эпикалык промо чыгарды. Бул промо каталондук клубдун Twitter баракчасына жарыяланганын eurosport.ru жазды.
Анда Лионель Месси менен Криштиану Роналду маңдайлаш отуруп, бири-бирине каршы ойногон беттештердин жыйынтыгын карап жаткан сүрөт бар. Аргентиналык спортчу отурган жактагы күзгүдө GOAT (Greatest of all time, мыктылардын мыктысы – ред.) деген жазуу турат.
Каталондук "Барселона" менен туриндик "Ювентус" Чемпиондор лигасынын тайпалык баскычынын акыркы турунда кездешет. Беттеш испандыктардын "Камп Ноу" футбол талаасында Бишкек убактысы боюнча 9-декабрга караган түнү саат 02:00дө башталат. Эки команда тең мөөнөтүнөн мурда эле мелдештин плей-офф баскычына жолдомону камсыз кылган.
Эзелки атаандаш футболчулардын командаларынын 28-октябрда Туринде өткөн биринчи беттешинде каталондуктар 2:0 эсебинде утуп кетишкен. Усман Дембеле менен Лионель Месси киргизген голдор беттештин тагдырын чечкен.