БИШКЕК, 8-дек. — Sputnik. Кыргызстандык белгилүү мушкер Алтынбек Мамашов АСА 116 турниринде беттешке чыгарын уюштуруучу компания Instagram тармагындагы расмий баракчасы аркылуу билдирди.
Турнир 18-декабрда болот. Ал көрүүчүсү жок өткөндүктөн түз эфирден гана баам салууга мүмкүн экени айтылды.
Мамашовдун атаандашы россиялык Виталий Слипенко. Ал октагондо 15 беттеш өткөрүп, анын 12синде жеңүүчү аталган.
Октагондо "Золотой" каймана аты бар Алтынбек Мамашов соңку кармашын былтыр, 29-ноябрда, Астана шаарында болгон ACA 102 турниринде өткөрүп, казакстандык Гойти Дазаевди сулата чаап, көпчүлүктү таң калтырган.
Спортчу жалпы 15 турнирге катышып, бирөөндө гана утулуп калганы маалым.
ACA — Ахматтын абсолюттук чемпионаты уюму дүйнө жүзүндөгү промоушендердин ичинде экинчи орунда турары МMA-oracle сайтында жазылган. Мындай рейтингге жетиши мурдагы эки уюмдун бир компанияга бириктирилишине байланыштуу. Биринчи сапта адаттагыдай эле UFC орун алган.