БИШКЕК, 7-дек. — Sputnik. Индияда белгисиз дарттан бир адам каза таап, 300дөн ашуун киши аны жуктуруп алган. Бул тууралуу жергиликтүү The Hindu басылмасы жазды.
Маалыматка ылайык, оору Андра-Прадеш штатында катталган. Дарыгерлердин айтымында, бейтаптардын башы айланып, адам талма болгондой абалга кептелүүдө.
Ооруканага түшкөн адамдардын коронавируска тапшырган анализи таза чыккан.
"Бул адамдардын ичкен суусу, жеген тамагынын үлгүсү менен каны соттук-медициналык экспертизанын лабораторияларына жөнөтүлдү. Азыр жыйынтыгы күтүлүүдө. Бейтаптардын компьютердик томографиясы жана рентгенограммасы нормада. Баары COVID-19га тест тапшырышты, жыйынтыгы таза чыкты", — дешти медиктер.
Жергиликтүү бийликтин өкүлдөрү ооруну абанын кирдешинен же туура эмес азык-түлүктөн улам жуктуруп алуу мүмкүнчүлүгүн да айтып жатышат.
Акыркы маалымат боюнча, бир киши каза таап, 315 адам ооруканада. Алардын арасында аялдар жана балдар да бар экени айтылууда.