Мелис Убукеевдин дипломдук иши болгон. "Тайгак кечүүдөгү" ирмемдер

Sputnik Кыргызстан агенттиги ата мекендик кинематографиядагы толук метраждуу эң алгачкы көркөм фильмдеги ирмемдерди сунуштайт.

КРдин эл артисти, белгилүү кинорежиссер, манас таануучу Мелис Убукеев 1964-жылы Москвадагы Бүткүл союздук мамлекеттик кинематография институтун (ВГИК) аяктап жатып дипломдук иши катары "Тайгак кечүүнү" тарткан. Ал эмгек кыргыз улутундагы режиссёр тарткан толук метраждуу тунгуч көркөм тасма катары тарыхта калган.

Кинокартинанын сценарийи Убукеев менен Николай Рожков жазуучу Мукай Элебаевдин "Бороондуу күндө", "Узак жол" чыгармаларынын негизинде жазып, операторлук кызматты Кадыржан Кыдыралиев аркалаган.

Үркүн убагында Кытайга качып, кийин өз мекенине кайткан жаш жигиттин тагдыры жөнүндө баяндаган эмгек 1965-жылы көрүүчүлөргө сунушталып, Алматы шаарында өткөн эл аралык фестивалда мыкты көркөм фильм аталып, анда образ жараткан Бакен Кыдыкеева "Аялдын ролун мыкты аткарганы үчүн" номинациясында дипломго арзыган.

Ал эми Шайырбек Көбөгөнов, Бакен Кыдыкеева, Муратбек Рыскулов, Болот Бейшеналиев, Советбек Жумадылов, Калича Рысмендеева жана болочоктогу белгилүү режиссёр Төлөмүш Океев роль жаратып катышкан.

Аталган фильмдин режиссеру жөнүндө кызыктуу фактыларды Sputnik Кыргызстан агенттигинин материалынан окуңуздар.