БИШКЕК, 6-дек. — Sputnik. Премьер-министрдин милдетин аткаруучу Артем Новиков Баткен жана Ош облустарына иш сапар менен барат. Бул тууралуу өкмөттүн маалымат кызматынан кабарлашты.
Иш сапар 7-9-декабрга пландалган. Анын жүрүшүндө Новиков өндүрүш объектилеринин иши менен таанышат. Ошондой эле Кадамжай районундагы оорукананын курулушун көрүп, Исфана шаарында аэропорттун оңдолгондон кийинки ачылышында болот.
"Мындан тышкары, ал 8-декабрь күнү Ферганада (Өзбекстан) өтө турган Кыргызстан менен Өзбекстандын чек арага жакын облустарынын жетекчилеринин кеңешмесине катышат”, — деп айтылат билдирүүдө.
Иш-сапардын аягында өкмөт башчынын милдетин аткаруучу "Эркеч-Там" көзөмөл-өткөрүү жайынын иши менен таанышат.