БИШКЕК, 28-ноя. — Sputnik. Бишкек – Ош жолунун 662-чакырымында Mersedes Benz Sprinter үлгүсүндөгү унаа жол четиндеги тосмону сүзүп, алты киши жабыркады. Бул тууралуу Ош облустук жол кыймылынын коопсуздугун камсыздоо бөлүмүнүн үгүт жана насаат иштери боюнча өкүлү Алтынбек Теңизбаев билдирди.
Анын айтымында, кырсыктан жабыркагандар Ош облустук ооруканасына жеткирилген. Окуя Кара-Суу районунун Шарк айыл өкмөтүндөгү Медресе айылында 28-ноябрга караган түнү болгон.
"Унааны Баткен облусунун Лейлек районунун 47 жаштагы жашоочусу башкарып келе жаткан. Кара-Суу районунун Медресе айылына жеткенде айдоочу рулду башкара албай жолдун четиндеги тосмону сүзгөн", — деди Теңизбаев.
Факты боюнча Кара-Суу райондук ички иштер бөлүмүнүн тергөө бөлүмү тарабынан тийиштүү экспертизалар дайындалып, сотко чейинки өндүрүш иши жүргүзүлүп жатат.