БИШКЕК, 25-ноя. — Sputnik. Мөөнөтүнөн мурда президенттик шайлоону уюштурууга 137,3 миллион сомго смета түзүлүп бекитилди. Бул тууралуу БШКнын маалымат кызматынан билдиришти.
Мыйзамга ылайык, шайлоону уюштуруу, өткөрүү жана көзөмөлдөөгө кеткен каражат республикалык бюджеттен алынат.
"БШК мөөнөтүнөн мурда президенттик шайлоону өткөрүүгө 137 миллион 290 миң 267 сомго смета түздү. Бул сумманын ичинен 2 475 шайлоо участогун добуш берүүгө даярдоого каражат бөлүнөт. Анын ичинен 45 шайлоо участогу чет өлкөлөрдө жайгашкан", — деп айтылат билдирүүдө.
Ошондой эле биометрикалык идентификация боюнча жабдууларды, компьютерлерди, урналарды, бюллетендерди жеткирүүгө жана санитардык-эпидемиологиялык коопсуздукту камсыздоого каражат бөлүнөт.
Аймактык жана участкалык комиссия мөчөлөрүнүн саны жалпысынан 31,8 миң адамга жетти. Алардын ар бири 2-3 миң сомдон сый акы алышат.
Ошондой эле жумушка чакырылган операторлорго (1 987 киши) жана техникалык кызматкерлерге (600 киши) эмгек акы берилет.
Мындан тышкары, шайлоо күнү күнү-түнү иштөөгө туура келгендиктен, комиссия мүчөлөрүнө, техникалык кызматкерлерге жана тартипти сактап турган милиционерлерге тамак-аш каралган.
Чыгымдар тизмеси:
- айлык — 69 миллион 644 миң 325 сом;
- Социалдык фондго төлөм — 12 миллион 10 миң 112 сом;
- ары-бери барып келүүлөргө кеткен чыгым — 2 миллион 282 миң 825 сом;
- байланыш акысы — 1 миллион 791,9 миң сом;
- ижара — 215 миң сом;
- транспорт чыгымдары — 4 миллион 144 миң 350 сом;
- башка товарларды жана кызматтарды сатып алуу — 36 миллион 398 миң 608 сом;
- чарба иштерине керектүү нерселерди сатып алуу — 10 миллион 803 миң 147 сом.