БИШКЕК, 18-ноя. — Sputnik. Президенттин милдетин аткаруучу Талант Мамытов Казакстандын Кыргызстандагы элчиси Кайрат Нурпеисовду кабыл алды. Бул тууралуу президенттин аппаратынан кабарлашты.
Тараптар Казакстан аркылуу өтүүчү Бишкек — Талас каттамы боюнча жүргүнчүлөрдү ташууну жандандыруу мүмкүнчүлүгүн талкуулашкан.
Эске салсак, буга чейин аталган каттам Казакстан тарабынан коронавирус пандемиясына байланыштуу токтотулган.
Талант Мамытов чек арадагы өткөрмө пунктуларынан жүк ташуучу унаалардын тоскоолдуксуз өтүүсүнө көмөк көрсөтүү маселесин да козгогон.
"Кыргызстандын жарандары Казакстандын аймагынан транзит менен гана өтөрүн эске алып, казак тарап Кыргызстанга жеңилдик көрсөтүү мүмкүнчүлүгүн карап көрсө", — деди Мамытов.
Элчи Кайрат Нурпеисов Талант Мамытовго кабыл алгандыгы үчүн ыраазычылыгын билдирип, Казакстан Кыргызстандын саясий жактан турукташуусуна жана экономикалык жактан гүлдөп-өсүшүнө кызыкдар экендигин белгилеген.