БИШКЕК, 15-ноя. — Sputnik. Кыргызгидромет агенттиги алдыдагы аптага карата аба ырайынын божомолу тууралуу маалымат берди.
Билдирмеге ылайык, келерки аптада аба ырайы суук болот деп божомолдонууда. Көпчүлүк аймактарда мезгил-мезгили менен жаан, тоо этектеринде жана тоолуу райондордо кар жаашы ыктымал.
Чүй, Талас аймактарында 15-19-ноябрга чейин күндүн көзү ачылбай, жаан, кар жаашы мүмкүн. Кээ бир райондордо туман түшүшү ыктымал.
Батыштан соккон шамалдын ылдамдыгы секундасына 4-9 метрден, 16-ноябрда 15-20 метрге жетиши мүмкүн.
Ысык-Көл облусунда 16-ноябрда жана 19-ноябрда жаан жаабайт. Калган күндөрү аба ырайы бузулуп, кар аралаш жаан жаай турганы божомолдонду.
Ал эми Нарында 16-17-18-ноябрда түнкүсүн жаан-чачын күтүлбөйт. 18-19-ноябрдан баштап кар түшүп, абанын температурасы кечкисин -10 градуска чейин суук болушу ыктымал.