Күнөскананын топурагын урук себерден мурда дезинфекциялап алуу зарыл. Бул тууралуу Кызайым Эргешова Sputnik Кыргызстан радиосунун эфиринде сүйлөп жатып билдирди.
Токтогазиев: 100 күндүн ичинде көзгө көрүнө турган иштер аткарылат
Анын айтымында, күнөскана курууда ошол жердин климатына дыкат көңүл бурбаса, баштаган бизнес текке кетиши мүмкүн. Мисалы, суук аймактарда үч тарабы дубал болгону туура.
"Маселен, кыштын күнү эрте жазда өсүүчү мөмөлөрдү өстүрүү кирешелүү ишкерлик тармагына кирет. Бирок анын мээнети да оор. Ошону менен катар эле бул тармакты жакшылап билбесең, түшүм ала албайсың. Алгач күнөскана кайсы жерге курулуп жатат, ошого маани берүү керек. Мисалы, биз Чоң-Алай, Алайда үч тарабын таштан же калыңдыгы 70 сантиметрге жеткен ылай-дубал менен тосуп жасадык. Мындан сырткары, күн чыгыш жакка каратып, бир тарабына кыйшайып турган күнөсканалар да бар. Буларда жылуулук жакшы сакталып, суук аймактарга курулат. Күнөскананын узундугу 15, туурасы 5-6 көп болсо, сегиз метрден ашпоосу зарыл. Өтө чоң куруп салганда да тиешелүү деңгээлде түшүм жыйнай албай калат. Экинчи маселе урук себиле турган топуракты жана күнөскананын ичин дезинфекциялап алуу керек. Ал үчүн горчица же эрмен, ачуу калемпир, сарымсакты ысык сууга чылап, демдеп, муздаган соң чыпкалап алып эритмени топуракка чачып чыгуу керек. Болбосо алгач горчицаны өстүрүп коюп, ал бир карыштай көтөрүлүп калганда өсүп турган ордунда эле майдалап кетмендеп салса болот. Мындан башка күкүрт кычкылы же атайын дарылар менен дезинфекцияласа да жакшы жардам берет", — деди Эргешова.
Адис ошондой эле өтө суук аймактарда жерди бир метрге чейин чукуп күнөскана жасаса болорун кошумчалады.