Sputnik Кыргызстан агенттиги белгилүү саясатчыны эскерип, анын сүрөттө калган ирмемдерин сунуштайт.
Насирдин Исанов 1943-жылы 7-ноябрда Ош облусунун Ноокат районуна караштуу Көк-Бел айылында туулган. Элеттеги мектепти бүтүргөндөн кийин Москва шаарындагы Куйбышев атындагы инженердик-курулуш институтуна өткөн. Айылдан барган жаш жигит ал жакта окуп жүргөндө кечинде окууга барып, күндүз курулушта эмгектенген.
Эмгек жолун мекенине кайтып келип "Ошгорстрой" ишканасында баштап, мастер, прораб, башкы инженер, башкы технолог болуп иштеген. Андан соң Коммунисттик партиянын катарына өтүп, 1976-жылы Алматыдагы жогорку партиялык мектепти аяктаган. 40 жашында Кыргыз ССРинин курулуш министри болуп, ал борбор калаадагы тарых музейи, "Ала-Тоо" аянты, Өкмөт үйүнүн курулушунун башында турган. 1988-жылы Ысык-Көл облусунун аткаруу комитетинин төрагалыгына дайындалган.
Сценарийи жатаканада жазылган. "Бакайдын жайытындагы" сейрек сүрөттөр
Кыргызстан эгемендүүлүк алган жылдары президенттик шайлоодо Аскар Акаев менен Насирдин Исанов экинчи турда күч сынашкан. Жыйынтыгында Акаев алдыга озуп чыгып, Исанов вице-президент болгонго жетишкен.
Саясатчы 1991-жылы КРдин биринчи өкмөт башчысы болуп шайланган. Исановду замандаштары жөнөкөй, кесипкөй, принципиалдуу жетекчи болгонун азыркыга чейин эскерип келет.
Мамлекеттик ишмер 1991-жылы 29-ноябрда Ош — Жалал-Абад унаа жолунда автокырсыктан көз жумган. Укук коргоо кызматкерлеринин маалыматы боюнча, 48 жаштагы өкмөт башчынын жеңил автоунаасын ЗиЛ-130 жүк ташуучу унаасы сүзгөн. Ал каргашанын чоо-жайы азыркыга чейин ачыкка чыкпай келет.
Насирдин Исанов өмүрлүк жары экөө бир уул, бир кызды тарбиялап чоңойткон. Алар дагы ата жолун улап мамлекеттик кызматтарда иштеп келет.