БИШКЕК, 5-ноя. — Sputnik. Америка Кошмо Штаттарында шайлоо комиссиясы президенттик шайлоодогу добуштарды эсептөөнү улантууда, акыркы жыйынтык азырынча чыга элек. Алдын ала маалыматтар боюнча, демократтардан талапкер Джо Байден алдыда келатканы айтылганын РИА Новости жазды.
Президенттикке ат салышкан эки талапкер тең алдын ала жыйынтык боюнча жеңгенин жар салышты. Толук жеңишке жетүү үчүн талапкерлер 538 тандоочунун эң кеминде 270 добушун алышы керек.
Учурдагы президент, Республикачылар партиясы көрсөткөн Дональд Трампта 214 добуш, ал эми анын атаандашы Джо Байден 264 добуш алган. Эми калган 60 тандоочунун добушу бөлүштүрүлүшү керек.
Байден президенттикке даярданып "өткөөл мезгилдин сайтын" ишке киргизди
Быйылкы жылы пандемияга байланыштуу көпчүлүк добуштар почта аркылуу берилген, ошондуктан алардын санын аныктоо өзүнчө убакытты талап кылууда.
Маанилүү штаттар
Негизги көңүл маанилүү делген, эки талапкерде бирдей мүмкүнчүлүгү бар штаттарга бурулган. АКШнын беделдүү ЖМКларынын маалыматы боюнча, төрт маанилүү штатта жыйынтыктар айтыла элек:
- Пенсильвания (20 тандоочу) — бул аймакта Трамп 50,9 пайыз менен алдыда (86,31 пайыз бюллетень эсептелген);
- Мичиган (16 тандоочу) —Байден 50,5 пайыз менен алдыда (99,13 пайыз бюллетень эсептелген);
- Невада (алты тандоочу) —Байден 49,3 пайыз менен алдыда (74,76 пайыз бюллетень эсептелген);
- Аляска (үч тандоочу) — Трамп 62,1 пайыз менен алдыда (52,94 пайыз бюллетень эсептелген).
Буга чейин Түндүк Каролина жана Жорджи аймактарында добуштар эсептелип бүткөнү айтылган. Анда Трамп 50,1 жана 49,7 пайыз менен алдыда келе жатат.
Байден алты тандоочунун добушун алыш үчүн Невада штатында гана жеңишке жетүүсү калды. Эгер жетсе, анда кийинки президент болуп калмакчы. Мындай болжолду алдын ала жыйынтыкка таянып Fox News телеканалы жасады.
Сотко арыз берүү
Трамптын штабы Жорджи, Мичиган жана Пенсильвания аймактарындагы эсептөөлөрдүн токтотулганы боюнча сотко арыз берди. Алар буга эсептөөлөргө көз салуу жеткиликтүү болбой калганын жүйө келтиришкен. Штаб ошондой эле маанилүү штаттардын бири Висконсиндеги добуштарды кайра саноону талап кылууда.
Ал эми Мичигандын мамлекеттик катчысы Жоселин Бенсон штаттагы добуштарды саноону токтотуу жөнүндө доону негизсиз деп сыпаттаган. Ал шайлоо комиссиясында ар бир добуш бардык эрежелер менен кылдат эсептелгенин кошумчалаган.
Митингдер
Вашингтон-сквер паркында дагы деле нааразычылык билдиргендер чогулуп турушат. Алардын бир тобу Джо Байденди колдосо, дагы бири Black Lives Matter кыймылынын активисттери.