БИШКЕК, 3-ноя. — Sputnik. Бүгүн Бишкекте дагы бир митинг өтүүдө. Башка нааразычылык акциясынын катышуучулары тарап кеткенин Sputnik Кыргызстан агенттигинин кабарчысы билдирди.
Анын айтымында, Бишкектеги спорт мектептердин бирин жетектеген адамдын кызматтан кетишин талап кылгандар Дене тарбия жана спорт агенттигинин жанына чогулган, бирок алар тез эле тарап кеткен. Анткен менен "Коррупциясы жок спорт" деп кыргыз, орус тилдеринде жазылган плакаттары ошол жерде калган.
Өкмөт үйү, УКМК жана Жогорку соттун имараттарынын алдында эч ким жок.
Ак үйдүн (Жогорку Кеңештин имараты) алдында эки күндөн бери "Айымдар кыймылы" деп аталган уюмдун өкүлдөрү турат. Алар саясий куугунттукка нааразы болуп, жаңы бийлик сөз берген люстрацияны талап кылышууда.
"Дордойдун" сатуучулары өкмөт үйүнө күч менен кирүүгө аракет жасашты. Видео
Бишкектеги алты митинг
Кечээ ордо калаада катары менен алты митинг өттү. Алар: "Түндүк электр" ишканасынын директорлор кеңеши компаниясынын жетекчилигине Улан Астаркуловдун дайындалганына нааразы болгондор, аны колдогондор, кыргыз-кытай чек арасынан жүктү өткөрүү көйгөйү жанына баткандар, "Дордой" базарынын сатуучулары жана саясий куугунтукка каршы болгон "Айымдар кыймылынын" акциясы. Булардан тышкары, өкмөт үйүнүн алдына чогулган дагы бир топ чакан насыя берчү компаниялардын ишине нааразы болуп, кредиттик мунапыс талап кылышкан.
Андан кийин ички иштер министринин мурдагы орун басары Курсан Асановдун тарапташтары митингге чыккан. Алар Асановду эркиндикке чыгарууну талап кылышкан.