БИШКЕК, 2-ноя. — Sputnik. Нарын облусунун Байзак айыл аймагына спорт комплексин куруу жана спорттук мектепти оңдоо учурунда мамлекетке 3,6 миллион сом чыгым келтирген деп куруучу компаниянын жетекчисине жана айыл өкмөт башчысына кылмыш иши козголду. Бул тууралуу Sputnik агенттигинин жергиликтүү кабарчысына облустук прокуратурадан билдиришти.
"Байзак айыл аймагына спорт комплексин курууда 3,3 миллион сомдук чыгым алып келген жана "Дордой" балдар спорт мектебинин ремонтуна деп бөлүнгөн 477 миң сомдун 364 миңин максатсыз пайдаланган "Акы-Курулуш" ишканасынын жетекчиси Ишенбек Султаналиевди Нарын шаардык соту эки айга камакка алуу чечимин чыгарды", — деп айтылат билдирүүдө.
ЖКККББнын жетекчи орун басары коррупцияга шектелип кармалды
Ошондой эле өз аймагында аткарылып жаткан курулуш иштерине шалаакы мамиле кылгандыгы үчүн Байзак айыл өкмөтүнүн башчысы Бердибек Жусуповго кылмыш иши козголду.
"2016-жылы Байзак айылындагы жаңы курулуп жаткан спорт комплексинин курулушун улантуу үчүн жарыяланган 3 миллион сомдук тендерди лицензиясы туура келбегендигине карабастан "Акы-Курулуш" ишканасы утуп алып, бүгүнкүгө чейин эч кандай жумуш аткарган эмес. Бирок тийиштүү каражаттар айыл өкмөтү тарабынан дароо которулуп берилип, жергиликтүү бийлик дагы өз аймагындагы ишти көзөмөлгө албагандыгына байланыштуу шалаакылык беренеси боюнча иш козголду", — дешти прокуратурадан.
Эки объектиден мамлекетке жалпысынан 3,6 миллион чыгым келтирилгени белгиленди.