БИШКЕК, 27-окт. — Sputnik. Биринчи вице-премьер Артём Новиков Россиянын Кыргызстандагы элчиси Николай Удовиченко менен жолукту. Бул тууралуу өкмөттүн маалымат кызматы кабарлады.
Жолугушууда Новиков Россия ар дайым Кыргызстандын ишенимдүү стратегиялык жана негизги соода-экономикалык өнөктөшү болуп кала берерин белгилеген.
"Эки тараптуу жана көп тараптуу форматта мурда кабыл алынган бардык милдеттенмелерди жүзөгө ашырабыз. Кыргыз тарап эки тараптуу соода-экономикалык, илимий-техникалык, гуманитардык кызматташтыкты уланта берет. Ошондой эле Евразия экономикалык интеграциясы жана КМШ алкагындагы кызматташтыкты өнүктүрүү жана тереңдетүү боюнча жигердүү кызматташабыз", — деди Новиков.
Россиянын КРдеги элчиси өз кезегинде Новиковду биринчи вице-премьер болуп дайындалышы менен куттуктады.
"Кыргызстандагы кырдаалга карабастан россиялык инвесторлор кыргыз рыногунда иштөөгө кызыкдар. Маанилүү маселелердин бири — инвесторлорду, анын ичинде россиялык ишкерлерди мамлекеттик деңгээлде коргоо жана алардын өлкөдөгү коопсуздугун камсыз кылуу. Россия Кыргызстан үчүн союздаш деп эч күмөн санабай айта алам", — деди Удовиченко.
Кыргызстан "Кант" авиабазасын кеңейтүү сунушу түшсө карап чыгууга даяр
Тараптар Евразия экономикалык биримдигине кошулууда салык тутумун модернизациялоо жана маркалоо тутумун киргизүү боюнча сүйлөштү. Мындан сырткары, Россия-кыргыз өнүктүрүү фондунун ишин активдештирүү боюнча биргелешкен долбоорлорду ишке ашыруу тууралуу пикир алышкан.