БИШКЕК, 14-окт. – Sputnik. Жогорку Кеңеш өкмөттүн курамы тез арада бекитилип, толук кандуу иштеп башташына колдон келген аракетин кылат. Бул тууралуу парламенттин маалымат кызматынын жетекчиси Ибраим Нуракун уулу Facebook баракчасына жазды.
Анын айтымында, Жогорку Кеңешке Канат Исаевдин төрага болуп келиши өкмөттүн ишине таасирин тийгизбейт.
“Тетирисинче, бул нерсе жаңы шайлоого чейин төрага өкмөт башчы мененен тыгыз иштешет дегенди түшүндүрөт.
Ошондой эле айрым депутаттар Садыр Жапаровдун дайындалышынын легитимдүүлүгүнө күмөн саноо болбош үчүн дагы бир ирет талапкерлигин жактыруу зарыл экенин кеп кылышты. Жогорку Кеңеш өкмөттүн курамы тез арада бекитилип, толук кандуу иштеп башташына колдон келген аракетин кылат”, —деп жазды Нуракун уулу.
Буга чейин парламенттин маалымат кызматы Жогорку Кеңеш эртең менен кезектеги жыйынга чогулуп, өкмөттүн курамын бекитерин маалымдаган эле.