БИШКЕК, 23-сен. — Sputnik. Эки күн мурда Бишкекте Финпол тарабынан кармалган салыкчы кызматтан бошотулду. Бул тууралуу Мамлекеттик салык кызматынан билдиришти.
Тиешелүү буйрукка кызматтын төрагасы Кабыл Абдалиева кол койгон.
Белгилей кетсек, Экономикалык кылмыштарга каршы күрөшүү кызматы Ленин райондук салык башкармалыгынын бөлүм башчысы кызматтык абалынан кыянаттык менен пайдаланган деп 21-сентябрда колго түшүргөн.
УКМК Бишкек менен Чүйдө ири салык төлөөчүлөрдү тескеген жетекчини кармады
Финполдун версиясы боюнча, О.А. аттуу бөлүм башчы салык органынын башка кызматкерлери менен жең ичинен сүйлөшүп, бир жаранга мыйзамсыз негизде патент берген. Бирок ал жаран анын атына патент берилгенин билген эмес.
Ошол патент менен ЕАЭБ өлкөлөрүнөн элге керектелүүчү товарлар ташып келинип, бирок салык төлөнбөй жүргөн. Мунун кесепетинен бюджетке болжол менен алты миллион сом түшпөй калган.