БИШКЕК, 21-сен. — Sputnik. БУУнун Башкы Ассамблеясынын 75 жылдык мааракелик жыйынынын Жогорку деңгээлдеги жумалыгында президент Сооронбай Жээнбеков Кыргызстандын атынан видео аркылуу кайрылуу жасайт. Бул тууралуу мамлекет башчынын маалымат кызматынан кабарлашты.
Анын сөзү БУУнун штаб-квартирасында бүгүн кечинде көрсөтүлөт.
Аталган жумалыктын алкагында ошондой эле БУУнун Башкы Ассамблеясынын жалпы дебаттары да өтүп, Жээнбеков анын алкагында 23-сентябрда да видео аркылуу кайрылуу жасайт.
Жээнбеков БУУнун башкы катчысы Антониу Гутерришке кайрылуу жолдоду
Мындан сырткары, мамлекет башчы 30-сентябрда БУУнун Башкы Ассамблеясынын мааракелик жыйынынын алкагында уюштурулган Биологиялык ар түрдүүлүк боюнча саммитте видеокайрылуу жасайт.
Маалымат үчүн: Коронавирус пандемиясына жана БУУга мүчө мамлекеттердеги жана Нью-Йорктогу учурдагы карантиндик чектөөлөргө байланыштуу, быйыл Жогорку деңгээлдеги жумалыктын алкагында бардык иш-чаралар онлайн режимде өткөрүлмөкчү.