БИШКЕК, 15-сен. — Sputnik. Кыргызстанда балдар үйүнүн тарбиялануучуларына батир алууга мүмкүнчүлүк түзгөн социалдык курулуш таптакыр жок. Бул тууралуу "Жетим балдардын укугун коргоо" коомдук фонддун жетекчиси Игорь Беляев Sputnik Кыргызстан радиосунун эфирине келгенде айтты.
Ал Кыргызстанда аталган үйлөрдөн тарбияланып чыккан улан-кыздар кандай көйгөйлөргө кабылгандыгын да баяндап берди.
Алиева: балдар үйүнүн бүтүрүүчүлөрүн колдогон атайын долбоор иштеп жатат
"Бишкек шаарынын аймагында жети миңге чукул социалдык объектилер жайгашкан. Балдар үйүнүн тарбиялануучуларын тизмеге койгон күндө деле андай турак жай алууга мүмкүнчүлүгү жок, ал кезекке өмүр бою турат. Бирок бул иштер дагы жасалбайт. Тарбиялануучулар чыккан үйдүн директорлору балдардын паспорттук маалыматтарын да отчёт үчүн эптеп беришет. Жашы жетип, балдар үйүнөн чыккандан кийин улан-кыздар ар кыл инстанцияга чуркап, документ чогултууга туура келет", — деген Беляев.
Фонддун жетекчиси 2015-жылдан бери Кыргызстанда балдар үйүнөн чыккан улан-кыздар боюнча маалымат базасы жасалбай келгендигин билдирди. Ал мындай тагдырдагы балдар-кыздардын канчасы каттоого туруп жашап жаткандыгын жана канча бөлүгү ишке орношкондугу белгисиз экендигин кошумчалады.