БИШКЕК, 8-сен. — Sputnik. Бишкек шаардык соттун чечими менен Юлиус Фучик атындагы парк толугу менен борбор калаанын мэриясына кайтарылды. Бул тууралуу муниципалитеттин маалымат кызматынан кабарлашты.
Мэриядан 1992-жылы мамлекеттик администрациянын чечиминин негизинде Фучик паркынын ичиндеги 7,41 гектар тилке Парктар жана эс алуу аймактарынын шаардык бирикмесине бекитилип берилгендигин айтышты. Мындан улам колдонуу үчүн атайын акт берилген.
"1995-жылы өкмөттүн токтому менен паркты Бишкек шаарынын мэриясына беришкен. Тилекке каршы, сейил жайдын бир канча аймагы — кинотеатрдын курулуп бүтпөй калган бөлүгү — 13 337 чарчы метр жер менчик колго өтүп кеткен", — деп айтылат маалыматта.
Бишкектеги "Ататүрк" паркындагы үйлөр түрттүрүлө баштады. Сүрөт
Мэриянын муниципалдык мүлктөрдүн башкармасы сотко М. П. менен С. Э. аттуу жарандардын ортосундагы сатуу жана сатып алуу боюнча келишимди жокко чыгаруу боюнча кайрылган. Фемида өкүлдөрү аны толугу менен канааттандырган.
"Кийинчерээк 1999-жылы С. Э. аттуу аял жер тилкени К. А. аттуу кишиге саткан. Доо арызды сот караганга чейин ал кожоюн аталган жерди тогузга бөлүп соодалап жиберген. Башкармалык сотко кайрылып, бул келишимдерди да жокко чыгарууну жана жерлерди муниципалдык менчикке кайтарып берүүнү суранган", — деп айтышты маалымат кызматынан.
Доо арызды канааттандырган райондук соттун чечимине макул болбогон жоопкер тарап Бишкек шаардык сотуна арызданган. Фемиданын шаардык өкүлдөрү биринчи инстанциянын чечимин күчүндө калтырган.
Эми ал жер аянттарын муниципалитеттин менчигине өткөрүп, каттоо боюнча иштер башталмакчы.