БИШКЕК, 7-сен. — Sputnik. Коронавирустан айыккан бейтаптар үчүн атайын реабилитациялоо программасы иштелип чыкты. Бул тууралуу Саламаттык сактоо министрлигинин штаттан тышкаркы башкы пульмонологу Талант Сооронбаев брифинг учурунда билдирди.
Анын айтымында, коронавирусту дарылоо боюнча 4-протоколго атайын бөлүм киргизилген. Ал — вирусту жеңгендерди кайра калыбына келтирүү программасы.
"Анда дүйнө жүзүндө жасалып жаткан, жөнөкөй, эч кандай каражатты талап кылбаган ыкмалар жазылган. Аталган программанын негизинде дарыгерлер окутулуп, инструкторлор даярдалып жатат. Бул боюнча видео түрүндөгү маалыматтар социалдык тармактарга тарап жатат. Реабилитацияны үй шартында көп дары ичпей эле жасоо керек", — деди Сооронбаев.
Кыргызстанда 134 адам коронавирустан айыгып, 55и жуктуруп алды. Статистика
Дарыгер өпкө сезгенгенден кийин фиброз болот деген маалымат чындыкка дал келбей турганын айтып, коронавирустан айыккандарга реабилитация сөзсүз керек экенин кошумчалады.