БИШКЕК, 4-сен. — Sputnik. Коопсуздук кеңешинин катчылыгы тарабынан өлкө аймагында коронавирус инфекциясынын жайылышына алып келген себептер менен шарттар иликтенип жатат. Бул тууралуу президенттин маалымат кызматы кабарлады.
Билдирмеге ылайык, Коопсуздук кеңеши сегиз жыйын өткөргөн. Анда вирустун жайылышын алдын алуу жана ушул жарым жылдыктагы экономикалык коркунучтарды жоюу маселеси талкууланып, тиешелүү сунуштамалар берилген.
Катчылык мамлекеттик органдарга берилген тапшырмалардын аткарылышына мониторинг кылып, иликтөө жүргүзөрү белгиленет.
Боронов: сентябрда эл массалык түрдө оорушу мүмкүн
"Учурда катчылык тарабынан Кыргызстанда коронавирус инфекциясынын жайылышына себеп болгон нерселер, адам өмүрүн алып кеткен жагдайлар иликтенип жатат. Анын ичинде мамлекеттик органдар менен саламаттык сактоо уюмдарынын калкка медициналык тез жардам көрсөтүүгө даяр эместиги тыкыр анализден өтүп жатат. Жыйынтыгы Коопсуздук кеңешинин жыйынына чыгарылып, керектүү чечимдер жана сунуштамалар берилет", — деп айтылат маалыматта.
Ушул тапта Финпол тарабынан төмөнкү фактылар боюнча сотко чейинки өндүрүш иштери жүргүзүлүп жатат:
- коронавирус инфекциясы менен күрөшүү боюнча республикалык штаб жана Саламаттык сактоо министрлигинин айрым кызмат адамдары тарабынан кетирилген шалаакылыктар;
- фармацевтикалык компаниялардын кызыкчылыгын көздөп, мамлекетке пайдасы жок келишимдерди жактаган коррупциялык иш-аракеттер;
- мамлекетке ири зыян же өзгөчө ири зыян келтирген мамлекеттик сатып алууларды жүргүзүүлөр.
Коопсуздук кеңешинин катчылыгы кызыкдар тараптардын бардыгын — жарандардан, эксперттерден жана жарандык коом институттарынан аталган маселе боюнча материалдарды жана сунуш-пикирлерди күтөт. Бул маалыматтарды иликтөө жана анализдөө үчүн, ошондой эле Коопсуздук кеңешинин жыйынына даярдалып жаткан материалдар менен жалпылаштыруу үчүн керек экени кошумчаланды.