БИШКЕК, 2-сен. — Sputnik. Кыргызстанда сегиз ай ичинде өрттүн саны 46,2 пайызга азайып, тилсиз жоодон 24 адам куткарылды. Бул тууралуу ӨКМден маалымдашты.
"Жыл башынан бери ушул убакка чейин республика боюнча 1 477 өрт кырсыгы катталып (2019-жылы 2 747 учур), өткөн жылга салыштырмалуу 46,2 пайызга азайган. Өрттүн кесепетинен 14 адам каза таап (2019-жылы 33 адам), 19 адам жабыркаган. Ошондой эле тилсиз жоодон 24 адам куткарылып, 2 миллиард 441 миллион 300 миң сомдук материалдык баалуулуктар сакталган", — деп айтылат билдирүүдө.
Бишкек — Ош жолунда эки бензовоз өрттөнүп, бир киши каза болду. Видео
Өрттүн негизги себептери төмөнкүлөр:
- электр жабдууларын колдонуудагы этиятсыздык — 41,4 пайыз;
- мештерди жана морлорду этиятсыз колдонуу — 9,5 пайыз;
- отко этиятсыз менен мамиле кылууда — 20,4 пайыз;
- балдардын от менен ойноосунан — 6,1 пайыз.
- Кайсы аймакта канча өрт чыккан?
- Облустар жана шаарлар боюнча өрттөрдүн саны төмөндөгүчө:
- Бишкек шаарында — 244 өрт;
- Чүй облусунда — 396;
- Ош облусунда — 202;
- Жалал-Абад облусунда — 202;
- Ысык-Көл облусунда — 151;
- Нарын облусунда — 55;
- Талас облусунда — 73;
- Ош шаарында — 50;
- Баткен облусунда — 104.
Бишкектеги кызыл жалын. Имарат ээси өрт атайылап коюлганын айтып чыкты. Видео
Өрттү алдын алуу үчүн эмне кылуу керек?
- бузук электр буюмдарын (розеткаларды, вилкаларды, өчүргүчтөрдү) колдонбогула;
- тез күйүүчү материалдарды чатырда, жер төлөдө сактабагыла;
- балдарды кароосуз калтырбагыла;
- күйүп турган тиричилик электр буюмдарын, радио, телевизор, газ плиталарын кароосуз таштабагыла;
- электр жылыткычтарын күйүүчү буюмдарга жакын орнотпогула;
- тамекинин калдыктарын жана ширеңкелерди таштабагыла.
Ошондой эле Кыргызстанда жыл башынан берки бардык өрттөрдүн 61,8 пайызы турак жайда чыкканы кошумчаланды.