БИШКЕК, 18-авг. — Sputnik. Кыргызстанда балдар арасында Кавасаки синдрому каттала элек. Бул тууралуу Эне жана баланы коргоо улуттук борборунун жетекчиси Камчыбек Узакбаев билдирди.
Белгилей кетсек, айрым ЖМКлар АКШ жана Европада сейрек кездешүүчү бул илдетке балдар көбүрөөк чалдыга баштаганын жазып чыгышкан.
Узакбаев эл аралык адистердин маалыматына таянуу менен балдар арасындагы Кавасаки синдрому көбүрөөк COVID инфекциясынан улам кездешип жатканын белгиледи. Бирок Кыргызстанда мындай учур катталган эмес.
Бүгүн өлкө аймагында 155 кишиден коронавирус чыкты
"Дүйнөдө Кавасаки синдрому катталып жатканы тууралуу маалыматтан кийин биз да буга даяр турушубуз керек. Биздин борбордо балдар арасындагы Кавасаки синдрому боюнча жумушчу топ түзүлгөн. Ошондой эле Саламаттык сактоо министрлиги менен биргеликте ал топ төртүнчү деңгээлдеги протокол даярдап жатат",— деди Узакбаев.
Саламаттык сактоо министрлигинин маалымат катчысы Жылдыз Айгерчинованын айтымында, жумушчу топ түзгөн документ балдарды дарылоо үчүн колдонууга берилет.
Ал эми Кавасаки синдрому — бул коронавирустун күчөп кеткен түрү катары эсептелинерин педиатр Диляра Искакова айтып берди.
АКШда коронавируска чалдыккан балдардын саны кескин өстү
"Кавасаки синдрому менен негизинен балдар ооруйт. Мында майда кан тамырлар сезгенип, кан айлануу системасы бузулат. Анын натыйжасында тромб пайда болот. Балдардын денесине кызыл бүдүр тактар чыгат. Бул синдром өтө кооптуу жана оңой менен айыкпайт. Вирустук инфекция болгондуктан ооруган адамдын дене табы көтөрүлөт", — деди дарыгер.
Кавасаки оорусу бейтапты инфаркт жана пневмонияга да кептеши мүмкүн экени кошумчаланды.