БИШКЕК, 8-авг. — Sputnik. Кыргыз-тажик чек арасында ок тийген аскер кызматкеринин абалы орто болсо, жергиликтүү тургун оор абалда. Бул тууралуу өкмөттүн Баткендеги өкүлчүлүгүнүн маалымат кызматынан кабарлашты.
Билдирүүгө ылайык, жабырлануучулардан кабар алуу үчүн ооруканага өкмөттүн Баткен облусундагы ыйгарым укуктуу өкүлүнүн биринчи орун басары Жаркынбек Максутов барды.
“Чек арачынын абалы орто, ал эми Көк-Таш айылынын тургуну оор абалда. Аларга өкмөттүн облустагы ыйгарым укуктуу өкүлү Алишер Абдрахмановдун резервдик фондунан акчалай жардам көрсөтүлдү", — деп айтылат маалыматта.
Учурда чек аралаш аймактарда абал туруктуу. Укук коргоо органдары ыкчам тергөө амалдарын жүргүзүп жатат.
Казак чек арасындагы чатак: мигранттар алдамчылардын торуна кантип түштү
Эске салсак, 6-август күнү эртең менен кыргыз-тажик чек арасында коңшулар тараптан ок атуу болуп, Кыргызстандын чек арачысы жаракат алгандыгы тууралуу маалымат тараган. Баткен облусунун Эки-Таш аймагында Тажикстан тараптан белгисиз адамдар аңчылык курал менен Кыргызстандын чек ара кызматынын аскерине ок атып, ал жоокердин колун тешип өткөнү маалым болгон. Мындан кийин эки тараптын өкүлдөрү жолугуп, чатакты Кыргызстан өзүнчө, Тажикстан өзүнчө иликтемей болгон. Себеби жарадар болгон кыргызстандык чек арачыдан башка тажикстандык бир жарандын каза болгону айтылган.
Ушул эле күнү кечке маал, болжол менен 18:00 чамасында, чек арага жакын жайгашкан Баткен районундагы Көк-Таш айылында дагы бир ирет ок атылып, айыл тургуну жаракат алган. Жабырлануучу оор абалда ооруканага жеткирилип, операция жасалган.
Кечээ Баткенде чек арада жарадар болгон экинчи адамга ок Тажикстан тараптан атылган.