БИШКЕК, 29-июл. — Sputnik. Бишкекте бейтаныш жигит беш адамга кычкылтек концентраторун алып келип берүүнү убадалап, акчасын алгандан кийин из жашырып кеткен. Бул тууралуу Ички иштер министрлигинин (ИИМ) маалымат кызматы кабарлады.
Билдирүүгө ылайык, Криминалдык милиция кызматы бул ишке шектүү катары кечээ, 28-июль күнү, Ысык-Көл облусуна караштуу Түп районунун 23 жаштагы О.М. аттуу тургунун кармаган.
7-июлда Биринчи май райондук милициясына Улан кичи районунун тургуну кайрылган. Анда ал өзүн Максат деп тааныштырган жаран 300 долларын алып "кычкылтек концентраторун алып келип берем" деген бойдон качып кеткенин айткан.
Баткенде ири суммага алдап кетти делген аял 10 жылдан кийин Москвадан кармалды
Бул окуя Кылмыш жана жоруктардын бирдиктүү реестрине Жазык кодексинин 204-беренеси ("Алдамчылык") менен катталган.
"Ыкчам-иликтөө иш-чараларынын жүрүшүндө шектүү бул кылмыштан тышкары пандемия учурунда ооруга чалдыккан, кычкылтек концентраторуна муктаж болгон дагы беш кишини алдап, акчасын алып качып кеткени аныкталган", — деп айтылат маалыматта.
Учурда шектүү Бишкек шаардык милициясынын убактылуу кармоочу жайына киргизилип, тергөө иштери жүргүзүлүүдө.