БИШКЕК, 28-июл. — Sputnik. Азыркы тапта Ош облусунда алты айга жетерлик дары-дармектин жана үч айлык жеке коргонуу каражаттарынын кору бар. Бул туурасында өкмөттүн аталган облустагы өкүлчүлүгүнүн маалымат кызматы кабарлады.
Билдирүүгө ылайык, коронавирустун жайылып кетишине бөгөт коюу максатында жер-жерлерде жалпы 5 700 орунга ылайыкташкан күндүзгү стационарлар ачылган.
Асрандиев: дары-дармек сатып алууга каражат жетиштүү, маселе башкада
"Өкмөттүн Ош облусундагы өкүлү Узарбек Жылкыбаев стационарларды жеке коргонуу каражаттары жана медициналык жабдыктар менен камсыздоо тапшырмасын койгон", — деп айтылат маалыматта.
Кечээ облус жетекчисинин биринчи орун басары Байыш Юсупов Кара-Суу районундагы күндүзгү стационарлардан кабар алган. Ошондой эле ал райондук оорукананын жана Үй-бүлөлүк дарыгерлер тобунун коргонуу каражаттарынын жана дары-дармектеринин корун көрүп чыккан.