БИШКЕК, 28-июл. — Sputnik. Өкмөттүн облустардагы ыйгарым укуктуу өкүлдөрү аймактагы эпидемиологиялык кырдаалга персоналдуу түрдө жооп берет. Бул туурасында өкмөт башчы Кубатбек Боронов Республикалык ыкчам штабдын жыйынында айтканын анын маалымат кызматы кабарлады.
Боронов аймактардагы эпидемиологиялык абалды көзөмөлдөн чыгарбай катуу тескөө керектигин эскерткен.
Кечээтен бери коронавирусту жеңген 1 091 киши ооруканадан чыкты
"Өкмөттүн облустардагы ыйгарым укуктуу өкүлдөрү аймактагы эпидемиологиялык кырдаалга персоналдуу түрдө жооп берет. Күндүзгү стационарларга кайрылгандардын динамикасы төмөндөп баратат деп бошоңдоп калбастан, жарандардын өмүрүн сактап калуу үчүн буга чейин белгиленген иштерди жүргүзүүнү улантуу керек. Өзгөчө илдеттин кесепетинен каза болгон учурлардын алдын алуу боюнча жумуштарды күчөтүңүздөр", — деген Боронов.
Жыйында эксперттер жана адистерден турган топ тарабынан иштелип жаткан дарылоонун жаңы протоколу тууралуу маалымат берилип, өкмөт башчы коронавируска каршы ийгиликтүү күрөшө алган өлкөлөрдүн дагы тажрыйбасын эске алуу керектигин айткан.
Коронавирусту дарылоонун жаңы протоколу чыгат. Боронов президент менен сүйлөштү
Боронов мамлекеттик сатып алуулар аркылуу ооруканаларга керектүү жабдууларды алып келүү иштерин күчөтүүнү милдеттендирген.
"Өлкөнүн ар бир облусуна компьютердик томография, рентген аппаратын сатып алуу боюнча иштерди катуу көзөмөлгө алуу шарт. Ошондой эле COVID-19 инфекциясын жугузуп алган жарандар дарыланып жаткан ооруканаларда кышкысын аба айланып туруш үчүн рециркуляторлор орнотулууга тийиш", — деген премьер-министр
Боронов аны менен катар эле Саламатттык сактоо жана Өзгөчө кырдаалдар министрликтерине эпидемиологиялык кырдаалдын кийинки баскычына жана илдеттин болжолдонуп жаткан экинчи толкунуна терең талдоо жүргүзүүнү тапшырган.
Өлкөдө коронавирус жуктуруп алган учурлардын саны 33 844кө жетти. Анын ичинен 22 296сы ооруну жеңип, айыгышты. Тилекке каршы, коронавирус 1 329 кишинин өмүрүн алды.