БИШКЕК, 25-июл. — Sputnik. Алматынын тургуну Равиль Тохтибакиев ооруканага өпкөсүнүн 100 пайызы жабыркап түшүп, бир жума жасалма дем алдыруучу аппаратта жаткандан кийин жакшы болуп кеткен. Бул тууралуу Sputnik Казакстан маалымат агенттиги жазды.
Бейтап анын өмүрү үчүн күрөшкөн дарыгерлерге жана реаниматологдордун тобуна ыраазычылык билдирген. Учурда ал пневмониядан кийин ден соолугун калыбына келтирип жатат.
Казакстандагы аза күтүү: Токаев пандемия курмандыктарын эскерди. Видео
Шаардагы көп тармактуу медициналык борбордун жалпы практикалык дарыгери Луиза Хазаеванын айтымында, өпкө толук жабыркаса эле өмүр менен кош айтышат деген түшүнүк туура эмес.
"Мындай бейтаптарды ооруканага убагында алып келиш керек. Дарылоодон кийин дагы өзүн жакшы кароого тийиш. Ден соолук узак убакытта калыбына келет. Дем алууну жакшырткан гимнастикалык көнүгүүлөрдү жасап, витамин терапиясын алуу керек", — деген медик.
Хазаева кошумчалагандай, эгерде бейтаптын беш күнгө чейин дене табы 38ден түшпөй, калтырак басып, кышылдап жатса дароо ооруканага алып келүү кажет.
Орто Азиядагы мамлекеттердин ичинен Казакстан коронавирус жуктуруп алгандардын саны боюнча алдыга чыкты. Учурда илдет 80 226 кишиде аныкталса, айыккандар 51 260, ал эми 585 киши көз жумду.