Бет кап тагынуу, аралыкты сактоо, антисептик колдонуудан сырткары дагы бир маанилүү эреже бар. Бул тазалыкты сактоо жана кайдыгер мамилени токтотуу. Дүкөндөн тамак-аш сатып алганда бир жолку колдонулуучу идиште деп эле жей бербей, сыртына антисептик чачып дезинфекциялоо керек. Бардык эле сырттан сатып келген буюмду үйгө алып кирерден мурда сода эритмеси же спирт менен тазалап коюу абзел. Мындай пикирин Асамидин Марипов Sputnik Кыргызстан радиосуна маек куруп жатып билдирди.
Анын айтымында, сыртка чыкканда тагынып чыккан бет капты жок дегенде күн сайын алмаштырып туруу зарыл. Бир бет капка антисептик чачып алып тагына берүү вирустан коргобойт.
"Калк арасында тартипти сактап жүргөндөр да көп, бирок айтканды укпай өз ден соолугун эле эмес коомду коркунучтуу абалга алып келгенге салымын кошуп жаткандар да жок эмес. Эгер биз вирусту кыска убакытта токтотууну кааласак, биринчи кезекте медиктер тарабынан айтылган эрежелерге баш ийүү менен тазалыкты сактоого көңүл бурушубуз керек. Өзүбүздү эле таза кармабай айлана-чөйрөбүздө да вирустун өөрчүшүнө шарт түзгөн факторлорду жок кылып турушубуз абзел. Анткени коронавирус алгач эле дем алуу органдары, андан соң көздөгү чел кабыктар аркылуу жугары белгилүү болду. Ошондуктан сырттан буюм сатып келгенде аны дезинфекциялап анан колдонуу, дезинфекция иштерин жүргүзүп жатканда көз айнек, бет кап, желим кол кап кийүү зарыл. Мисалы, ошол эле дүкөндөрдө муздаткычта жаткан тамак-аштарды сатып алууда сыртына антисептик чачып анан жеш керек. Аны сизге чейин кимдер кармаганы белгисиз. Сыртында вирус туруп калган болсо ал муздаткычта суткалап сакталып тура берет да", — деди Марипов.
Дарыгер жалпы колдонулуучу сүлгүгө кол аарчыбай, жеке гигиена эрежелерин ар ким өзүнүн күнүмдүк жашоосунда колдонуп жүрсө жугуштуу оорулардан алыс болорун кошумчалады.
Ноокаттык медиктер кан куюп COVID-19дан айыктырышууда. Дарыгер Марипов менен маек