БИШКЕК, 11-июл. — Sputnik. Баткен облусунда бүгүнкү күндө 5 179 гектар аянттагы кылкандуу дан эгиндери жыйналды, анын 2 583 гектары буудай, 2 596сы арпа. Мындай маалыматтар өкмөттүн облустагы өкүлү Алишер Абдрахманов Лейлек районунун Маргун айылындагы оруп-жыйноо иштеринен кабар алган учурда айтылды.
Өкүлчүлүктүн маалымат кызматы билдиргендей, түшүм гектарынан орточо 24 центнерден алынууда.
Өкмөттүн өкүлү техника, күйүүчү май жана башка маселелер боюнча дыйкандар менен баарлашып, алардын абалын сураган.
"Алишер Абдрахманов коронавирустан улам түзүлгөн кырдаал талаа жумуштарына тоскоол болбошу керектигин, жергиликтүү бийлик, дыйкандардын муктаждыгын өз убагында чечип, оруп-жыйноо иштеринин өз убагында аткарылышына жооптуу экенин белгиледи", — деп айтылат маалыматта.
Облуста ошондой эле 626 гектардан картошка, 565 гектардан жашылча, 2 734 гектардан мөмө-жемиш, 410 гектардан буурчак жыйналды.
Кыргызстанда дыйкандар быйыл эмне өстүрүү менен алек. Статистика
Быйылкы жыл үчүн жалпы 25 миң 776 гектар аянтта оруп-жыйноо жумуштарын аткаруу пландалган. Бул өткөн жылга салыштырмалуу 1 115 гектарга көп.