БИШКЕК, 9-июл. — Sputnik. Оштун Кара-Суу районундагы "Баястан" тойканасынын ээсине сотко чейинки өндүрүш иши ачылды. Бул тууралуу Ош облустук Ички иштер башкармалыгынын маалымат катчысы Жеңиш Аширбаев билдирди.
Анын айтымында, 7-июлда Фуркат айылында жайгашкан тойкананын чайканасында тушоо кесүү тою өткөн. Аталган факт Кылмыш жана жоруктардын бирдиктүү реестрине катталып, Жоруктар жөнүндө кодекстин 127-беренесинин 1-бөлүмү ("Чектөө иш-чараларынын талаптарын бузуу" ) боюнча ресторан ээсине сотко чейинки өндүрүш иши ачылган. Ал 40 жаштагы Жалал-Абад облусунун тургуну.
Бир күндө үч той өткөрүп, 79 кишини ооруткан үй-бүлө. Өзбекстандагы окуя
"Аталган тойкана ээсине буга чейин эки ирет эскертүү берилип айып пул салынган жана ресторан 15 күнгө жабылган. Ага карабай ресторандын чайканасында тушоо кесүү тою өткөн", — деп айтылат маалыматта.
Өзгөчө абал учурунда Ош облусунун аймагында карантиндин талаптарын бузуу фактысы боюнча 37 иш сотко чейинки өндүрүшкө алынганы кошумчаланды.