БИШКЕК, 2-июл. — Sputnik. Кыргызстанда жашаган Россия жарандарынын көбү Баш мыйзамына өзгөртүү киргизүүнү колдошту. Бул тууралуу Sputnik агенттигинин кабарчысына Россиянын Кыргызстандагы элчилигинен айтышты.
Добуш берүүгө жалпы 3 212 адам катышкан.
Россия элчилигинде Баш мыйзамга түзөтүү киргизүүгө добуш берилүүдө. Видео
Баш мыйзамды өзгөртүүнү 2 875 жаран (89,5 пайыз) колдогон добуш берсе, 318 (9,90 пайыз) адам каршылыгын билдирди. Алардын ичинен 19 (0,59 пайыз) бюллетень жараксыз болуп калды.
Борбор калаада россиялыктар аталган мамлекеттин КРдеги элчилигинин имаратында добуш берди. Бардык санитардык эрежелер сакталып, процесс 8:00дөн 20:00гө чейин уланды.
Добуш берүү тилкелери Караколдо, Ошто жана Кантта да өткөрүлдү.
Россиянын европалык бөлүгүндө добуш берүү дагы да уланууда. РФтин Борбордук шайлоо комитетинен билдиргендей, иштетилген протоколдордун 15 пайызы боюнча өзгөртүүнү 71,46 пайыз жаран колдоп, 27,55 пайызы каршы болгон.
Путин Конституцияга өзгөртүү киргизүү боюнча добуш берди. Видео
Баш мыйзамга киргизилген өзгөрүүлөрдө президентке, өкмөткө жана ар кыл деңгээлдеги мамлекеттик кызматкерлерге талаптар жаңыланган. Жарандарга мамлекеттик социалдык кепилдиктерди бекитүү, парламенттин ыйгарым укуктарын өзгөртүү жана федералдык аймакты ажыратып алууга тыюу салуу, орус тилинин макамын бекемдөө каралган. Андан сырткары, бир беренесинде Кудай эскертилип, россиялык мамлекеттүүлүгүнүн өнүгүшү үчүн мураскерлик туурасында да айтылат.
Ошондой эле учурдагы иштеп турган мамлекет башчысына 2024-жылы кайрадан президенттик шайлоого катышууга мүмкүнчүлүк берет.