БИШКЕК, 28-июн. — Sputnik. 118 сурап-билүү кызматына кошумча адистер тартылат. Ал эми келерки аптадан тарта дагы 20 тез жардам бригадасы ишке киришет. Бул туурасында өкмөттүн маалымат кызматы премьер-министрдин айтканына таянып кабарлады.
"Эгерде аптанын башында 118 кызматына күн сайын 40-50 киши чалса, учурда анын саны 13 эсеге көбөйдү. Андыктан кеп-кеңеш бере турган бул кызматтагылардын санын көбөйтүүнү чечтик. Муктаж болгон ар бир киши кеп-кеңешти же медициналык жардамды өз учурунда алышы керек", — деген Боронов.
Бишкек медиктерге муктаж! Мэрия дарыгерлердин жардамга келишин суранууда
Премьер-министр Тез жардам кызматынын иши да абдан көп болуп жаткандыгын айткан.
"103 кызматына Бишкек боюнча өткөн суткада 4 561 ирет кайрылышкан. Алардын көбүн медиктер тейлеген. Бир тобу телефондон кеп-кеңеш алса, бир катарына бригада барган. Анткен менен баарына барганга медиктер жетишпейт. Келерки аптадан тарта дагы 20 тез жардам бригадасы ишке киришет", — деген Боронов.
Өкмөт башчы бейтапты үйүнөн алып келе жаткан Тез жардам кызматы аны кайсы ооруканага алып барарын билгендей кылып, ишти бир нукка салууга тапшырма берген.
"Тез жардам ооруканадан бейтапка орун издеп шаарды кыдырып жүрө бербеши керек. Эл аталган кызмат менен келип түшсө да ооруканада кезек күтүп отурганына нааразы болуп жатат. Мындай учурда алар кезексиз тейлениши керек. Андыктан Тез жардам менен оорукананын бул боюнча ишин ылайыкташтыруу керек. Муну да элдин сөзүнө калбай тез чечүү зарылдыгы турат", — деген Боронов.
Өкмөт башчы медициналык мекемелердин ишин күчтөндүрүү үчүн аскер комиссариаттарында мобилизациялык иштер жүргүзүлгөндүгүн билдирген.
Ар кыл деңгээлдеги аскер кызматына милдеттүү болгондордун тизмеси такталган.
Боронов: Тез жардам менен келгендерди албай койгонду, күттүргөндү токтоткула!
Мындан сырткары, медициналык жогорку окуу жайлардын студенттерин ишке тартуу иштери жүрүп жатканын айткан. Алар ординаторлор, интерндер жана алардан сырткары окуу жайлардын мугалимдери. Жогоруда саналып өткөндөр иштей турган болсо тиешелүү компенсация төлөнүп бериле тургандыгын айткан.