БИШКЕК, 27-июн. — Sputnik. Кыргызстанга эмгеги сиңген илимий ишмер жана дарыгер, медицина илимдеринин доктору, профессор Мария Нанаева 93 жашында каза тапты. Бул тууралуу өкмөттүн маалымат кызматы кабарлады.
Некрологдо анын фармокологияга, медицинада кадрларды даярдоого жана коомдук иштерге кошкон салымы белгиленген.
"Нанаева Кыргызстандын бийик тоолуу фармакологиясынын негиздөөчүлөрүнүн бири болуп саналат. Анын илимий иштеринин көбү дал ушул темага арналган. Ошондой эле медицинада кадрларды даярдоодо баа жеткис салымы бар. Ал кесиптик ишмердүүлүгү менен катар коомдук иштерге активдүү катышып, үч жолу Фрунзе шаардык депутаттар кеңешине депутат болуп шайланган", — деп айтылат билдирмеде.
Мария Нанаева 1927-жылы 22-ноябрда Талас облусунда туулган. Ал 1949-жылы Кыргыз мамлекеттик медицина институтун (КММИ) мыкты баа менен аяктаган. Андан соң Н.И.Пирогов атындагы Москва мамлекеттик медициналык институтунда аспирантураны окуган. 1952-жылы кандидаттык диссертациясын мөөнөтүнөн эрте жактаган.
Белгилүү кинорежиссер Бакыт Карагулов көз жумду
Жаш адис 1954-жылы Кыргыз мамлекеттик медициналык институтуна жумушка чакырылат. 1955-1960-жылдары окуу жайдын фармакология кафедрасынын ассистенти, андан соң доценти болгон. 1961-жылдан 1997-жылга чейин, башкача айтканда, 36 жыл бою КММИнин фармакология кафедрасын жетектеген. Бул жылдар ичинде кафедранын окутуу-усулдук, илимий изилдөөчүлүк жана тарбия иштерин өркүндөтүүгө зор салым кошкон. Кыргызстанда иштеген дарыгерлердин көбү Мария Нанаевадан билим алышкан.
Нанаеванын жетекчилиги менен 10 кандидаттык диссертация жакталып, 5 монографиянын жана окуу пособиелеринин, 80 окутуу-усулдук сунуштамалардын автору болуп саналат. 200дөн ашык илимий эмгектерди ал өзү жана окуучулары бийик тоолуу фармакологиянын актуалдуу көйгөйлөрүнө арнап чыгарышкан. Бул эмгектери чет өлкөдө да белгилүү.
Ысымы тарыхта калат! Болот Шерге бийликтегилер тарабынан жазылган некролог
Ишиндеги жетишкендиктер үчүн Ардак грамота, орден, медаль, сыйлык жана наамдарга татыган.
Өкмөт Мария Нанаеванын үй-бүлөсүнө жана жакындарына терең кайгыруу менен көңүл айтып, орду толгус кайгыларын тең бөлүшөрүн билдирген.