Учурда коронавирус жуккандардын саны күндөн-күнгө көбөйүүдө. Андыктан өзүбүздү чектеп, үйдө болуу талапка ылайык. Эң жакшы жагы, бул боюнча биздин тажрыйбабыз бар. Үйдө отургандын оң жана терс жактарын билип калдык. Мындай пикирин Нуриза Батырбекова Sputnik Кыргызстан радиосунун эфиринде маек куруп жатып билдирди.
Анын айтымында, адамдар жардам керек болсо психологдорго кайрылгандан уялбашы керек.
"Өлкөдөгү абал курчугандыгына байланыштуу кайрадан үйдөн чыкпоо зарылдыгы жаралууда. Мындан улам кайсы жакка кайрылып, кимден жардам сурасам, жумушумду үйдө отуруп иштөөгө өткөрө аламбы, убактымды кантип кызыктуу жана пайдалуу өткөрсөм болот деген суроолорго токтолуп, план түзүп алган оң. Көбүбүз биринчи карантин маалында алдыга койгон планыбыздын 70 пайызын аткара алган жокпуз. Себеби эч жакка чыкпай үйдө отурууга көнгөнчө эле бир топ убактыбыз өтүп кетти. Эгер адам бир ишти жасай албай калса, ал тынчсызданууну, агрессияны шарттайт. Кээ бир адамдар өзүн жоготуп, паникага алдырып ийиши ыктымал. Ошондуктан алдыда аткара турчу иштерди пландап, «коопсуздук жаздыгы» сыяктуу альтернативдүү варианттарды даярдап алган туура. Андан тышкары, балдар да келе жаткан окуу жылында аралыктан окуп калуусу мүмкүн болуп жатат. Аларга да өз алдынча убакытты туура бөлүштүрүп, пайдаланууну үйрөтүү зарыл. Үйдөн кечке эле китеп окута бербей, көңүлүн көтөрүп, жашоону кызыктуу кылып, бардык нерсени оюн аркылуу жасаганга аракет кылган жакшы. Эскерте кетсек, 111 номеринде иштеп жаткан балдар психологдоруна да кайрылса болот", — деди Батырбекова.
Психолог жогоруда айтылган кеп-кеңештер айта келгенде оңой болгону менен жасаш кыйын экенин айтып, күнүнө бирден эрежени ишке ашыруу аркылуу адам өзүн жеңсе болорун кошумчалады.