БИШКЕК, 25-июн. — Sputnik. 45 жаштагы жөө күлүк Оболбек Осмонбеков Ат-Башы районунун (Нарын) Талды-Суу айылынан Бишкекке чейин чуркап келди. Бул тууралуу Жаштар иши, дене тарбия жана спорт агенттигинин маалымат кызматы кабарлады.
Билдирмеге ылайык, жөө күлүк Ат-Башыдан 19-июнь күнү чыгып Бишкекке 24-июнда жеткен. Ал финишти Дөлөн Өмүрзаков атындагы стадиондо жасаган. Чуркап келген спортчуну дароо дарыгерлер карап, анын абалын канааттандырарлык деп баалаган.
Осмонбековдун айтымында, ал 400дөн ашык чакырымды багынткан. Муну менен ал жаштарды дени сак жашоого чакырып, спорт менен достошууга үндөп кеткен.
"Жолду катар аны автоунаа менен үч адам коштоп келген. Эс алуу учурунда алар спортчуга массаж жасап, өзүнө келүүгө жардам беришкен. Финишке жеткенде Осмонбековду Мамагенттиктин жетекчиси Канатбек Арпачиев, достору жана жакындары тосуп алышкан", — деп айтылат маалыматта.
Арпачиев жөө күлүктү финишке ийгиликтүү жетиши менен куттуктап, ага кубок жана ыраазычылык кат тапшырган.
Маалым болгондой, Осмонбеков спорттун бул түрү менен 2017-жылдан бери машыгат. Буга чейин ал бир катар ультрамарафондорго катышкан.