БИШКЕК, 24-июн. — Sputnik. Кыргызстандык делегация Москва шаарынан Бишкекке чыкты. Бул тууралуу президенттин маалымат катчысы Толгонай Стамалиева билдирди.
"Учар алдында Сооронбай Жээнбеков Россия президенти Владимир Путин менен телефон аркылуу сүйлөштү. Эки тарап тең Жээнбековдун Улуу Ата Мекендик согуштагы Жеңиштин 75 жылдыгына арналган парадга катыша албай калгандыгын өкүнүү менен белгиледи", — деп айтылат билдирүүдө.
Бүгүн Москвадагы парадга катышуу үчүн барган кыргыз делегациясынын эки өкүлүнөн коронавирус аныкталгандыктан, президент иш-чарага катышпай эле коюуну чечкен. COVID-19 аныкталгандар президенттик аппараттын тышкы саясат бөлүмүнүн башчысы Данияр Сыдыков жана күзөт кызматынын кызматкери болуп чыкты.
Белгилей кетсек, буга чейин пландаштырылган график боюнча президент Сооронбай Жээнбековдун Россияга кийинки иш сапары, ошондой эле Улуу Ата Мекендик согуштагы Жеңиштин 75 жылдыгына карата Россия тараптын чакыруусу менен 30-июнга белгиленген. Бул күнү Ржев шаарында 1941-1945-жылдарда Улуу Ата Мекендик согушта каза болгон кыргызстандык аскерлердин эстелигинин расмий ачылышы пландаштырылган.