БИШКЕК, 23-июн. – Sputnik. Ушул жылдын апрель айында Кыргызстандан акча которуунун көлөмү 17,7 миллион долларды түздү. Бул тууралуу Улуттук банктан кабарлашты.
Кеп жеке жактардын атайын системалар аркылуу акча которушу тууралуу болуп жатат.
2019-жылдын апрель айында өлкөдөн сыртка 46,8 миллион доллар чыккан. Эки жылдын бир эле айында которулган акчанын көлөмүн салыштыра турган болсок, быйыл бир топ аз экенин көрүүгө болот. Башкача айтканда, бул 2012-жылдан берки эң төмөнкү көрсөткүч.
Январдан апрелге чейинки маалыматты салыштырганда, 2020-жылы сыртка чыккан акчанын көлөмү 132,3 миллион долларды түзгөн. Бул 2019-жылдагыдан 31 миллионго кем. Жалпылап айтканда, 2020-жылы акча которуунун көлөмү 2018-2019-жылдарга салыштырмалуу кескин азайган.