БИШКЕК, 19-июн. — Sputnik. АКШ президенти Дональд Трамп күзүндө боло турган шайлоодо демократтар демилгелеген почта аркылуу добуш берүү болсо гана жеңилип каларын айтты. Бул тууралуу Washington Times басылмасына шилтеме берип РИА Новости жазды.
"Анткени демократтар шылуунданып, уурдашат. Айрым аймактарга, өзгөчө республикачылар жашаган, бюллетендерди жибербей коюшу мүмкүн", — деди Трамп.
Ошондой эле мамлекет башчы анын шайлоодогу негизги атаандашы боло турган мурдагы вице-президент Жо Байден, 2016-жылы ат салышкан Хиллари Клинтондон дагы алсыз экенин кошумчалады.
"Бирок анын аппараты күчтүү. Анткени демократтардын азыр айласы куруп турган учур", — деди президент.
Белгилей кетсек, АКШда ноябрь айында өтө турган президенттик шайлоодо азыркы абалды эске алуу менен Калифорния штатынын губернатору, демократ Гевин Нью бюллетендерди почта аркылуу шайлоочуларга жиберип, добуш алууну демилгелеген. Ал эми учурдагы президент бул ыкманы сындап келет.