БИШКЕК, 18-июн. — Sputnik. Парламентте алыскы чек ара заставаларында иштеген жубайларга жеңилдик берүү мыйзам долбоору сунушталды.
Негизги демилгечи Элвира Сурабалдиеванын айтымында, бул мыйзам Чек ара кызматында иштеген түгөйлөрдүн үй-бүлөлүк шартын жакшыртуу максатында иштелип чыккан.
"Бул демилге күйөөсү да, аялы да чек араны кайтаруу органында иштеген аскер кызматкерине тиешелүү. Эгер күйөөсү башка жакка ротация болсо, үй-бүлөсүн дагы алып кетет. Бирок инфраструктурасы жок, бийик тоолуу "Эркечтам" сыяктуу чек ара бекеттеринде иштеп калса, ал жактан аялына жумуш жок иштебей отуруп калат. Буга байланыштуу анын аскер кызматындагы эмгек тажрыйбасы токтотулат", — деди Сурабалдиева.
Мындан улам күйөөсү которулган заставадан жубайы жумуш жок иштебей калса, анын эмгек стажысын 5 жылга чейин токтотпой эсептей берүү сунушталып жатат.
Ошондой эле Сурабалдиева кыргызстандыктар Россиянын аскердик окуу жайларында окуп жүргөндө 15 миң рубль стипендия алып, тамак-аш менен камсыздалса, мекенине келгенде 15 миң сом маяна менен жумушка орношоруна нааразы болду. Мындан улам жоокерлердин 30 пайызы башка кызматтарга кетип каларын айтат.
Аталган мыйзам долбоору парламенттин жалпы жыйынында биринчи окууда каралып, добуш берүүгө жөнөтүлдү.